Во календарската 2007 година до Комисијата за заштита на правото за слободен пристап до информациите од јавен карактер како второстепен орган од страна на барателите на информации беа поднесени вкупно 330 жалби. Од нив 18 беа поднесени во јануари, во февруари 5, во март 7, во април 17, во мај 34, во јуни 49, во  јули 32, во  август 7, во  септември 8, во октомври 26, во ноември 104, додека во декември 23 жалби.
Она што паѓа в очи, а воедно и загрижува е податокот дека од вкупниот број (330)  поднесени жалби до Комисијата, 205 жалби се заради молчење на администрацијата, додека останатите 125 жалби се или заради ненавремено доставување на бараната информација, или заради нецелосни или делумни одговори на имателите.
Дел од жалбите се поднесени и како последица на некоординираноста меѓу барателите на информации и нивните полномошници – адвокати. Пример: имателот на барателот му ја доставил бараната информација, но тој не го информирал својот полномошник и обратно. Не се ретки и случаите кога барателот кој барал да му биде доставена фотокопија од некој документ, иако уредно известен, не ја подигнал пратката од пошта и истата е вратена на првобитната адреса.
    Постапувајќи по поднесените жалби,  Комисијата ги имаше предвид и мислењата на домашните и странски експерти од оваа област, а секогаш се водеше од аспектот според кој слободниот пристап до информациите од јавен карактер треба да биде водечкиот принцип во севкупната комуникација меѓу имателите на информации од јавен карактер и граѓаните, баратели на тие информации.