Во календарската 2007 година на адреса на досега евидентираните иматели на информации од јавен карактер биле поднесени вкупно 1476 барања за пристап до информации од јавен карактер. Притоа граѓаните добиле одговор на 1330 барања што биле предмет на нивниот интерес, додека на 146 поставени прашања имателите или не одговориле („молк на администрацијата„), или со соодветни решенија ги информирале барателите за причините поради кои се одбиени нивните барања за пристап до информациите од јавен карактер.
Најинтересни за граѓаните, биле државните институции, а пред се министерствата, Генералниот секретаријат на Владата и Канцеларијата на Претседателот на Владата на Република Македонија, како  и Градот Скопје. Од вкупно евидентираните 1476, до нив биле упатени 701 барање.
Поднесените барања во најголем број се однесувале на добивање информации за: процесот на денационализација, договори за продажба и трансформација на одредени стопански субјекти и јавни претпријатија, пооделни владини одлуки за формирање на комисии, спроведување на конкретни тендерски постапки, распределба или трошење на буџетски средства од аспект на нивната предвидена намена, за услови и критериуми за добивање и распределба на социјална помош,  услови за градби,  за заштита на животната средина… Бараните документи,  граѓаните најчесто инсистирале да ги добијат  во форма на фотокопија.